Чери кыйигöн.

Ок и гажа гожöм кад миянлы, челядьлы! Öд сэки ми мед уна шойччам да гажöдчам, тшöтш и удж вичмыштö. Дерт, позьö унатор казьтыштны да гижны, но ме висьтышта чери кыйöм йылысь. Öтчыд гожöмын мунім ми мамкöд да дядя Сергейкöд чери кыйны. Поводдяыс вöлі зэв лöсьыд. Ю дорас колö мунны дыр, пос вывті, коді ёна нин киссьöма. Мунан туй вывтіс, видзöдан водзö да аддзан – сійö нюжалöма быттьö кузь лента. Но коркö тай воим жö. Шуны кö, гожöмнас вöр – ваыс зэв и мича. Мунан вöр дорті да казялан, быттьö пуясыс шöпкöдчöны – сёрнитöны öта-мöдныскöд, а гашкö, и миянлы мыйкö висьтавны кöсйöны. Найö сулалöны зэв зумыда, салдатъяс моз. А вот и мыччысисны видзьяс. Кутшöм долыда лэбалöны на весьтті уна пöлöс лэбач да гаг! Бобувъяслöн рöмыс синтö вежö: найö дзик уна рöма дзоридзьяс кодьöсь. Неылын тыдовтчис и ю. Кор ми матыстчам сы дорö, шонді югöръяс улас юыс дзирдалö эзысьöн. Сылöн места вылын оз сулавсьы, сійö пыр визувтö, корö миянöс аскöдыс. Водзлань алькöса-крут кыркöтшъяса. Берег пöлöныс быдмöны уна пöлöс пу да кустарник: пелысь, льöм, сьöд да гöрд сэтöр. Ми корсим сэтшöм места, кöні берегыс бурджык да лэччим ю дорö, заводитім кыйсьыны. Ме ог шу, мый меным заводитіс пыр шедны чериыс, медводдза чериöдзыс колö вöлі виччысьны да виччысьны. Понным тшöтш ветліс миянкöд.Сійöс шуöны Милка. Сійö абу на ыджыд, дзик кычипи на. Сійö сьöд да еджыд рöма. Зэв вильыш, радейтö ворсны мекöд. Менам Милка первойысь на аддзис юсö и зэв кöсйö вöлі тöдмавны, мый сійö ваыс. И кыдзи ва пиас пырис и кутіс вартчыны. Ме думайта, сылы зэв ёна кажитчис. Чериыс меным вöлі оз шед, и ме муртса эг бöрддзы, зэв вöлі забеднö сыысь, мый мамöлы дас чери нин шедіс, дядя Сергейлы дас вит, а меным ни öти. Но вот менам табйöй легзьыштіс. Ме лэпті, но вугырас нинöм эз вöв. Терпенньööй менам ньöти абу вöлöма. Ме зэв дыр виччыси: мамлöн чериыс уна, а менам абу. Думайта, гашкö, сэні зэв бур местаыс, а тані лёк, сійöн оз и шед чериыс.

Муні ме мам дінö, мед сэні кыйсьыны, но и сэні тöлкыс абу вöлöма. «Дядя Сергей дорö ветлыны,» - думайта ме, но эг мун. Виччыси – виччыси и друг казялі, мый табйöй менам вöйи. Ме öдва черисö лэпты, вот тайö вöлі ыджыд чери – ёкыш. Ме лои сэтшöм рад! А миян Милка туплясьö лыа пиын. Дядя Сергей сетöма сылы дзоляник чери, и сійö чöсмасьö. Меным шеді нöшта кык чери. Öтисö гусьöникöн сеті Милкалы. А то сійö ме вылö сэтшöм синъясöн вöлі видзöдö, жаль босьтіс, вот и сеті. Поводдяыс сэки вöлі зэв жар, и ме зэв ёна кöсъя вöлі купайтчыны. Ме шуи: «Локтöй купайтчам,ваыс öд шоныд.» Мамöй вочавидзис: « Он! Ваыс кöдзыд, висьман, аслыд жö лёк лоö.» Мый вöчан? Мамтö колö кывзысьны. Регыд мысти дядя Сергей шуис: «Локтöй купайтчам, зэв пö жар лоис.» Ме рад! Бур на, мый купальникöс пасьталі, сідз и тöді, мый купайтчам. Ме пыри ва пиас, сунышті. Сэтшöм лöсьыд! Горза налы: «Пырöй, пырöй, ваыс шоныд!» Сэсся ме Милкаöс на кори, но сійö эз пыр, пока ме эг сет сылы чери, вот кутшöм сюсь. Петім васьыс, лои ыркыд, но ме котöрті и öдйö пасьтаси. Лыаыс вöлі зэв пöсь, мый весиг коктö сотö. Милка петіс дзик ва, кынмö. Ме сійöс кори и шонтышті, зэв öд ёна радейта, и Милка менö тшöтш. Ми косьтысьыштім и бара кутім кыйсьыны. Мамлы мыйкö эз кут шедны, а ме сöмын лэптала да лэптала черисö. Дядя Сергейлы тшöтш шедö чериыс, сійö рад. Со и мамлы кутіс шедны. Ми кыйим öтлаын зэв уна чери. Сыысь ми вöчам фарш да котлет. Зэв бур, кор эм ю, кöні олö чери, кодöс кыйны зэв интереснö. Аддзам ми: локтö кымöр. Навернö, вайö зэр. Ми кутім мöдöдчыны гортлань. Мунам, мунам, и ме видзöда: Милкаыд абу. Öдйö котöрті бöр сійö местаас, а Милка узьö шонді водзын. Ме горöді понйöс, оз кыв – чорыда узьö. Ещö горöді, и садьмис, öдйö котöртіс ме дінö. И ми суöдім мамöс да дядя Сергейöс. Регыд ми воим гортö. Миянлы ставнымлы вöлі зэв нимкодь тайö чери кыйöмсьыс, кöть неуна и мудзыштім. Эска, мый татшöм луныс лоö оз на öтчыдысь.